Balade 863 : Par trois cens ans .lx. et .iii. aprés (MCCLXII)
Balade comment Brennyus assiega le capitole de Romme et Comment il fonda.vi. citéz, dont milan est l’une
Par trois cens ans .lx. et .iii. aprés
Que Romme fut de Romulus fondee
Brennuys, dus, et de Sueve attrés,
Princes de Sens des Gaulx de la contree
5 Romme destruit, la jouvente a tuee
Et Fabius le consul desconfit
En bataille, le Capitole assit.
De mil livres se firent tributaire
Ceuls de dedenz, et fut leur grant profit :
10 Brennuys fut princes de hault affaire.
Car en ces [temps fist] merveilleux conquests
Pour exaucier Sens et sa renommee,
Les Gaulx aussi, dont le memoire est frés.
Fist .vi. citéz. Chacune a ordonnee
15 En divers lieux : l’une est Milan nommee,
Senogale, Brixe, Veronne, et dit
Cilz qui ses faiz et sa vie descript
Que Sene voult en Toscanne parfaire,
Et Pavie que sur le Pol assit :
20 Brennyus fut princes de hault affaire.
Ses gens furent tousjours aux armes pres
Cent mil en ot toudis en son armee,
Jeunes et fors, arméz de bons harnés,
Qui conquirent mainte terre a l’espee.
25 Par eulx fut lors Ytale subjuguee,
Grece depuis, .iic. mil Gaulx y mit
Et de leur nom furent Galathas dit.
De tous pais lui vouldrent treu faire,
Puis en Delphos ala, ce le honnit :
30 Brennuys fut princes de hault affaire.
L’envoy
Princes, par tout doit estre recitéz
Ly noms Brennyus qui fonda six citéz
Que cy dessus avéz oy retraire 343d
Par qui Rommains furent desheritéz,
35 Grece et mains lieux soubmis et conquestéz :
Brennyus fut princes de hault affaire.
