Balade 862 : A Dieu me plaing et a ses sains (MCCLIX)
Autre Balade de cahymans et de coquins
A Dieu me plaing et a ses sains,
A toutes gens de saincte Eglise,
De ces faulx caymans, villains
Truans, coquins, qui par faintise
5 Faingnent maulx et en mainte guise
En ces moustiers, et font tel presse
Qu’a paine y puet l’en oir messe
Ne avoir sa devocion.
Grant pechié fait qui les y lesse : 342d
10 Que n’en fait l’en pugnicion ?
Car les larrons, ribaulx, sont sains
Qui par sang, herbes, autre mise
Sur drapiaux, font sembler mehains
A pluseurs, et par leur emprinse
15 Est Dieu robé. Soubz leur chemise
Sont bien nourris et plains de cresse.
Soient traiz hors a une lesse
Du temple ou font polucion.
Grant pechié fait qui les y lesse :
20 Qui n’en fait l’en pugnicion ?
De maquerelles, de putains,
Truandes, qui font leur divise
De porter enfans en leurs mains
Et d’empeschier le saint servise
25 Par truander. Or y advise
Chascun endroit soy, tant que cessse,
Par non donner et par destresse,
Es moustiers tel abusion.
Grant pechié fait qui les y lesse :
30 Qui n’en fait l’en pugnicion ?
L’envoy
Prince et prelas, soiéz certains
Que caymans seront ratains,
Truans, truandes, s’on les presse
A cours batons de gros neux plains.
35 Lors seront de leurs maulx restrains.
Et fuiront vostre region.
Grant pechié fait qui les y lesse.
Que n’en fait l’en pugnicion ?
