Balade 861 : Vous qui avéz chox, pois, feves et lart (MCCLVIII)
Balade que il n’est riens qui vaille fanchise
Vous qui avéz chox, pois, feves et lart,
Saille, forment ou pain d’orge a mangier,
Par vo labour, et pouéz tost ou tart,
Et franchement lever, dormir, veillier,
5 Ne vueilliéz pas vo franchise avillier
Pour estat nul, comm font les curriaulx
Ne pour vivre de precieux morsiaulx
Ou la mort gist par convoiteuse envie,
Mais manger, frans, fruiz, laitues, poreaulx,
10 Car il n’est riens qui vaille franche vie.
Qui sert il fault toujours avoir regart
A son seigneur, pour son corps avancier,
Que de meffaire et du courcer se gart
Et qu’il soit prest de toudis traveillier
15 A son vouloir, ou pas ne l’ara chier.
Et s’en grace est, envie aura de ceaulx
Qui sont a court. Frans garder les pourceaulx 342c
Lui vauldroit mieulx qu’en serve seignourie
User son corps soubz les biens desloyaylx,
20 Car il n’est riens qui vaille franche vie.
Par asservir franchise se depart
Quant il la fault vivre en autrui dangier,
Qui faim et soif mainte foiz lui repart.
Ce lui fait lors ses qualitéz changier
25 Et de la mort ains son terme approchier.
La vie est brief des grans et des royaulx,
Si vault [bien] mieulx frans mangier ses naveaulx,
Joieux de cuer, et boire eaue jolie,
Que vivre sers, tristes, plains de joyaulx,
30 Car il n’est riens qui vaille franche vie.
L’envoy
Prince, tresors, richesse[1] a granz monceaulx,
Or et argent, saintures et chapeaulx
Ne valent pas une pomme pourrie
Qui n’est joieux, frans, humbles et loyaux :
35 Vive donc frans qui puet, c’est li plus beaux,
Car il n’est riens qui vaille franche vie.
[1] Ms. richesses ; Saint Hilaire corrige en richesce
