Balade 860 : Depuis qu’Amour m’ot donné congnoissance (MCCLVII)
Balade amoureuse et de congnoissance d’amour
Depuis qu’Amour m’ot donné congnoissance
Et qu’il me voult son serviteur nommer,
Que .xvi. ans n’oy, en lui prins tel plaisance
Que tout mon ceur mis des lors a amer
5 Dame ou il n’a orgueil, vice n’amer,
Jeune, gentil, belle, bonne amoureuse,
Humble en regart, en maintien gracieuse,
De qui je suy le servant et seray
Pour son grant bien et sa vie joieuse :
10 A tousjours mais, com[me] siens l’ameray.
Car des .xv. ans qu’elle ot en son enfance,
Lui plut a moy le nom d’ami donner
Et je lui fis com serfs obeissance
Et lui promis de son honeur garder,
15 Et elle m’a fait venir et aler,
Cerchier maint lieu, aventure doubteuse
En maint pais, et chose adventureuse,
Et par ma fay, se bien ou renom ay,
Tout vient de lui, c’est m’amour precieuse :
20 A tousjours mais comme siens l’ameray.
Mais en mon cuer ay trop grant desplaisance
Que si loins suy de son viaire cler,
Hors des marches ou est sa demourance, 342b
Qu’oir ne puis son gracieus parler.
25 Ce jour de may, que la deusse honourer,
Soit souvenant de mon fait et piteuse
Et ne me soit, se loing suy, oublieuse,
Car se Dieu plaist, briefment la reverray,
Comme celle qui fait ma vie eureuse :
30 A tousjours mais comme siens l’ameray.
L’envoy
Prince, on ne puet deça ne dela mer
Nulle dame querir ne reclamer
Ou il ait plus d’onneur que li en sçay.
Or me doint Dieux a joye retourner
35 Briefment vers li, car sanz mon cuer muet
A tousjours mais comme siens l’ameray.
