Balade 859 : Je ne sçay en la vie humaine (MCCLVI)

Autre Balade de la corrupcion de vie humaine

                        Je ne sçay en la vie humaine
                        Rien ou il n’ait corrupcion,
                        Et que a la fin ne [nous] maine
                        Par temps et par succession
5                      La mort, ne generacion
                        Ne pouoit durer par li, mais,
                        Dont j’ay grant admiracion,
                        Envie ne mourra jamais.

                        Car, des Adam, prant son demaine
10                    En Eve, et par sa mocion
                        Ingrade, d’avarice plaine,
                        Fist faire la transgression
                        A tous deux, dont Dieu passion
                        Reçut en croix pour nos meffais :
15                    De vivre est en possession.
                        Envie ne mourra jamais.

                        Tant a esté de mort soudaine
                        Depuis celle creacion,
                        Aages nouveaux, diluge et paine,
20                    De regnes grant mutacion,
                        D’empires renovacion,
                        De roys, d’empereurs, clers et lays
                        Qui sont mors. En conclusion,
                        Envie ne mourra jamais.                                                                     342a

                        L’envoy

25                    Princes, selon m’entencion,
                        Les gens sont cause et mocion
                        D’avoir Envie en leurs palays.
                        Povre vit en elacion,
                        L’un mort prant en l’autre action :
30                    Envie ne mourra jamais.