Balade 864 : Le bien commun doit tout homme garder (MCCLXIII)
Balade du bien commun amer
Le bien commun doit tout homme garder
Et preferer devant touz autres biens.
Qu’est bien commun ? Ce qui puet regarder
Proufit de tous, jeunes et anciens,
5 Garder la loy, son pais et les siens,
Justice avoir, sur tout mettre ordonnance[1],
Un pris, un poys, une aulne, une balance,
Mesure aussi, et delivrer tout un
Aux achateurs, sanz faire decevance :
10 Ainsi se doit garder le bien commun.
Places convient pour vendre et achater
Les derrees, bons regars et science,
Si c’om ne puist ce bien commun frauder,
Pugnir tous ceuls a lui contrariens,
15 Entendre aux arts, estre praticiens
De gouverner du peuple la chevance,
Sanz retenir, mais de toute puissance
Et loyaument la maintiengne chascun,
En l’employant pour franchise et croissance :
20 Ainsi se doit garder le bien commun
Ou chascun part mais en particulier
Ne part c’un seul. Cilz runge comme chiens
Le bien commun quant il veult convoiter
Et amasser, lors n’est telz communs riens,
25 Mais est destruit comme furent Troyens
Par Eneas qui convoita finance :
Contre ce bien fist aux Grecs aliance.
Or nous gardons de ce convoiteux flum 344a
En deffendant ce bien jusqu’a oultrance :
30 Ainsi se doit garder le bien commun.
L’envoy
Prince, adviséz des Rommains la vaillance,
Car tant eurent ce bien en remembrance
Qu’onques fouléz ne fut entr’eulx d’aucun,
Mais fut long temps gardé en tel doubtance
35 Que tout mirent a leur obeissance :
Ainsi se doit garder le bien commun.
[1] Ms. en ordonnance
