Balade 854 : A chascun dy qu’il s’avise ou il sert (MCCLI)
Autre Balade comment serviteurs doivent adviser comment et a qui ilz servent au jour d’uy
A chascun dy qu’il s’avise ou il sert
En jeune temps, sanz perdre son service,
Car s’a felon veult servir, il se pert.
Qui tel maistre sert, il est foul et nice,
5 Car pour bien mal rent, c’est son droit office,
Et en la fin son servent destruira
Quant prins le fruit de sa jeunesce ara.
Esch[i]ve aussi trois manieres de gens
Sanz les servir, qui tenir s’en pourrra :
10 Et qui sont ilz ? Femme, peuple et enfans.
En pluseurs lieux de leur service appert
Quant a femme, qui de mescroire a vice,
Maint serviteur en ont esté desert[1]
Contre raison et par mauvais malice.
15 A croire tost est en tous cas propice.
<Et pour cent biens qu’om leur fait on n’y[2] pert,
Mais qui fauldra une foiz, lors s’aert>[3]
En destruisant le service qu’elle a,
Sanz lui oir, du tout le destruira.
20 Or se gardent d’icelles tous servens
Et des autres, ou leur fait perira :
Et quelz sont ils ? Femme, peuple et enfans.
Quant aux peuples, les choses prannent vert
Aux gouverneurs, plains de bonne police.
25 En maint pais sont esmut et dispert,
Soudainement font leur bende et leur lice 340c
Contre les bons et rendent benefice
De cruaulté. Par Boece apparra.
Et des enfans, chascun d’iceulx rendra
30 Paint pour fruit : Seneque en fut soufrans
Jusqu’a la mort ou Noyron le mena :
Et quelz sont ils ? Femme, peuple et enfans.
L’envoy
Prince, je croy qu’a doleur finera,
Du moins le plus, qui telz gens servira,
35 Car en eulx n’a amour, pité ne sens.
Serve com[4] moy enfans, il le sçara,
Car destruit m’ont. Or aviséz tous la :
Et quelz sont ilz ? Femme, peuple et enfans.
[1] Ms. deserte
[2] Saint Hilaire corrige en y
[3] Vers surnuméraires
[4] Ms. comme
