Balade 853 : Puis que je voy que Voulenté domine (MCCL)
Autre Balade comment raison et conscience faillent, et en leur lieu regnent volunte et fole plaisance
Puis que je voy que Voulenté domine
Et que Raison et Conscience fault,
Que les plus grans sont enclins a rapine,
Qu’om eslieve le plant qui rien ne vault,
5 Et que Justice en tous estas deffault
Et faint par tout pour plaire a Voulenté,
Que les saiges anciens sont osté,
Mis hors d’estat, et qu’om les habandonne,
Pour vivre en paix et en transquilité,
10 Je prie a Dieu qu’om ne m’oste ne donne,
Et que le bien commun qui se decline
Par les mauvais qui trop luy font d’assault,
Puist revenir sanz aler en cuisine
Et sanz garnir le chastel de Boursault,
15 Dont Convoitise et Avarice sault.
Estat d’orgueil et de grant vanité,
Peché de char, insexte et povreté,
Mainte au surplus degenerent personne,
Et pour telz maulx dont maint seront dampné,
20 Je prie a Dieu qu’om ne m’oste ne donne.
Car vraiement tout se destruit et mine
Et destruira par le pechié trop chault
Dont Loth dehors Sodome s’achemine,
Car il vendra pestilence du hault,
25 Soudaine mort [et] de prince default.
Ainsi seront maint regne deserté
Et en autruy lignie trnsporté
Par folignier de la droicte couronne.
Dont, com vivre ay pour ma neccessité,
30 Je prie a Dieu qu’om ne m’oste ne donne.
L’envoy
Prince, pour ce que tout est triboulé 340b
Et que nul bien n’est huy remuneré
Ne mal pugny, mais es tout hors de bonne,
Qui a du sien si en vive en bon gré.
35 Faire le vueil, souffisance est plenté.
Je prie a Dieu qu’om ne m’oste ne donne.
