Balade 851 : Je suis mis hors trop cautement (MCCXLVIII)
Balade comment Eustace fut mis cautement hors de son bailliage de Senlis
Je suis mis hors trop cautement
Du bailliaige de Senslis,
Qui ay servy treslonguement
En jeunesce. Or suy envieillis,
5 Sanz estre de nul mal reprins.
Mais en lieu de mon bailliaige
Me fist l’en tresorier sauvaige,
Qui fors .viii. jours ne me dura.
Revoquéz fu. Aviséz la
10 Comment et a qui vous servéz,
Et ce moult valoir vous pourra.
Je suy des premiers escosséz.
Ingratitude me sousprant
Car les vaillans princes jadis
15 Guerdonnoient tresgrandement
Ceuls dont ilz furent bien servis,
Et tindrent, tant qu’ils furent vis,
En leurs estas, tel fut l’usaige,
Sanz changier ne faire dommaige,
20 Et pour [ce] chascuns les ama. 339c
Viellesce ne les destourna
D’estre de leurs estaz ostéz,
Mais tout se change et changera.
Je suy des premiers escosséz.
25 Si l’endurray paciemment,
Quant je suy sanz cause desmis
Et que j’ay servy loyaument.
Par .xxx. ans et plus, les perilz
De justicier, paroles, cris
30 Ay passéz, souffers maint oultraige
Et alé par maint dur voyage[1]
Pour mes seigneurs. Ce grevé m’a,
Justice aussi, qui nul port n’a.
Or en suy trop mal guerdonnéz.
35 Advise a ces poins qui vouldra.
Je suy des premiers escosséz.
L’envoy
Prince, aviséz benignement
A mon fait, si qu’aucunement
Soye par vous remuneréz
40 D’estat honourable ou d’argent,
Ou dire me fault tristement :
Je suy des premiers escosséz.
[1] Saint Hilaire corrige en voyaige
