MCCXLVII. Le temps est hui que de bonne heure est nez
Balade que cellui est de bonne heure nez qui n’a au jour d’ui a la court estat ne gouvernement
Le temps est hui que de bonne heure est nez
Qui a court n’a gouvernement n’estat,
Qui n’est juges, ne en chose ordonnéz
De quoy li puist sourdre noise ou debat,
5 Car, chascun jour, Envie se debat
Pour desposer officiers royaulx
Et en mettre par tout de si nouveaulx,
Par volunté, sanz regarder raison,
Que cilz vit bien com preudoms et loyaulx
10 Qui a de quoy pour vivre en sa maison.
S’il lui souffist, il est reconfortéz
De non verser com les autres de plat,
Qui es estas sont trop avant boutéz
Et puis en sont en un seul moment mat.
15 Fortune lors encontr’eulx se combat
Par le raport des mauvais desloyaulx.
Receveur n’est, tresoriers, generaulx,
Qui ne versent a petit d’achoison.
Sur tous ces points doit saiges estre caux
20 Qui a de quoy pour vivre en sa maison.
Et quant je voy telz estas fortunéz
Verséz ainsi, et que Fortune bat
Tous les meilleurs, je suy entalentéz
De moy jamais bouter en cel esclat,
25 Fors Dieu servir qui de moy fist rachat,
Mangier du lart, poys, feves ou naveaulx,
Coucher, lever, sanz estre curiaulx,
A mon pouoir, pour avoir garison : 339b
Ainsi faire le doit tous cuers feaulx
30 Qui a de quoy pour vivre en sa maison.
L’envoy
Princes, li homs est plus que forsennéz,
Qui du sien a, quant il est telz menéz
Qu’il s’asservit. Durer ne puet foison
Par convoiter. Or en soit destournéz
35 Tout noble cuer, comme frans et senéz,
Qui a de quoy pour vivre en sa maison.
