Balade 849 : En mon cuer n’a, ce jour de may, verdure (MCCXLVI)

Autre Balade comment l’acteur s’excuse de faire aucuns diz amoureux pour ce que tout est mal ordonné ou royaume

                        En mon cuer n’a, ce jour de may, verdure,                                       338d
                        Joye, deduit n’amoureus sentement.
                        Pour quoy ? Pour ce que mainte creature
                        Voy au jour d’ui en paine et en tourment,
5                      Ne je ne voy nul bon gouvernement
                        Au bien commun ne en fait de justice.
                        De la loy Dieu, de la foy est esclipse,
                        Division et convoitise est nee
                        Entre pluseurs, orgueil et avarice.
10                    Toute chose est par tout mal ordonnee[1].

                        L’un a l’autre fait mal, tort et injure.
                        Pour extorquer or, joyaulx et argent,
                        On bat, on ment, on rapine, on parjure.
                        En mains pais va tout desloyaument,
15                    Et le plus fort en fait a son talent.
                        Pité n’a lieu, nulle amour n’est propice,
                        Et Verité ne fait pas son office.
                        L’Eglise Dieu est par tout divisee,
                        Vertu ne voy regner, fors que tout vice.
20                    Toute chose est par tout mal ordenee.

                        Des prodommes anciens n’a nulz cure,
                        Reboutéz sont. L’en fait eslectement
                        Des non sachans. Se telz temps longues dure,
                        Et ce scet Dieu, l’en verra bien comment
25                    La fin sera et le pugnissement
                        Des malfaicteurs et de leur grant malice,
                        Car en brief temps fault que mauvais perice
                        Et que bonté soit aux bons guerdonnee[2].
                        C’est loy de Dieu : gart soy qui en mal glice.
30                    Toute chose est par tout mal ordenee.

                        L’envoy

                        Prince, aviséz par tout voist autrement.
                        Nobles et clers et peuples ensement
                        Crions mercy. Soit no vie muee                                                          339a
                        En bonnes meurs et en amendement,
35                    Ou tout se pert a nostre dampnement.
                        Toute chose est par tout mal ordenee.

[1] SaintHilaire corrige en ordenee

[2] Ms. guerredonnee