Balade 848 : Entre les biens que l’en fait chascun jour (MCCXLV)
Entre les biens que l’en fait chascun jour
De charité et de misericorde,
Pour acquerir de Jhesucrist l’amour,
Si com Henry de Fyerville recorde,
5 Donner pour Dieu, saindre toudis la corde,
Et acomplir tous les commandemens
De nostre loy, n’est establissemens
Qui vaille tant, sanz faire male toste,
Que bien paier en tous lieux ses despens : 338c
10 Belle chose est de contenter son hoste.
Car hostelains reçoivent a honnour
En leurs hostelz maintes gens, et par ordre,
Qui par long temps font illec leur demour,
Mais de paier leurs despense naist discorde
15 Au departir. Et pour ce je m’acorde
Que non paier est uns ravissemens
Des biens d’autrui, et unz droiz dampnemens
Dont cilz sera pugny, qui advise oste.
Prendre[1] ou rendre fault, c’est drois jugemens :
20 Belle chose est de cont[ent]er son hoste.
Pain, vin et char, foing, avoine, en destour
Convient avoir, et que litiere s’orde
Pour les chevaulx, chandelles : quel labour !
Liz, draps, coussins, cueuvrechiefs. Qui recorde
25 Les feux qu’om fait et les fraiz, ne m’amorde
D’ostel tenir, les serviteurs, les gens
Qui de servir ne sont pas diligens.
Ayse n’est pas qui tel rostie toste.
Et qui acroit, c’est uns doubles tourmens :
30 Belle chose est de contenter son hoste.
L’envoy
Princes, je tiens que c’est souverains sens
De bien paier sa despense en tous temps,
Sanz acroire et sanz rungier la coste
De l’ostelain. Garde y soyons prenans,
35 Car paradis sera aux hien payans :
Belle chose est de contenter son hoste.
[1] Saint Hilaire corrige en Pandre
