Balade 847 : Pour quoy dit l’en les .vii. ars liberaulx (MCCXLIV)
Pour quoy dit l’en les .vii. ars liberaulx ?
Pour ce que nul, s’il n’estoit liberal,
Noble homme et franc ou attrait des royaulx,
Le temps passé, ou en especial
5 Donné aux Dieux, n’osast en general
Nulz de ces ars retenir ne aprande.
Pour ce fut clerc le grant roy Alixandre,
Julles Cesar, qui tant fut renommé,
Charles le Grant qui fist maint peuple rendre :
10 Roy sanz lettre est comme asne couronné.
En enfance, que leur sang estoit chaux,
Aprenoient li noble et ly royal
Les sciences, les vertus cardinaulx,
Gardans leurs corps de lesion de mal
15 En jeusne temps, puis furent a cheval, 338b
Fors et puissans, pour toute honneur emprandre.
Ne leur failloit estrange conseil prandre.
Car chascun d’eulx estoit saige et lettré.
Autrement va. S’en est maint regne mendre.
20 Roy sans lettre est comme asne couronné.
Moult conquirent roys clers[1] par leurs travaulx
En cellui temps, furent monarchial
Pluseurs d’iceuls. Par leur sens, comme caux,
Firent citéz, et le bien communal
25 Amerent tuit d’amour bonne et loyal,
Et justice firent a tout comprandre.
Princes non clers n’y ont voulu entendre,
Dont les pluseurs en sont desherité.
Ces ars veuillent tous les nobles reprandre :
30 Roy sanz lettre est comme asne couronné.
Prince, adviséz voz enfans d’aage[2] tendre
De mettre aux ars, mieulx en vaudront leur membre,
Et ne seront corrumpu n’affolé,
Dont ilz pourront mieulx leur peuple deffendre
35 Et gouverner justement sans mesprendre :
Roy sanz lettre est comme asne couronné.
[1] Ms. chevaliers
[2] Ms. des aage
