Balade 846 : De jour en jour et d’annee en annee (MCCXLIII)
De jour en jour et d’annee en annee
De mal en pis vient ma destruction,
Et les pechiéz dont je suy condempnee,
Perseverans en ma perdicion :
5 Non craindre Dieu, orgueil, ambicion,
Pechié de char, ravissement publique,
Et, qui pis est, l’ort, vil, pechié inique,
Innaturel, que l’Escripture nomme
Sodomita, dont Dieu dire s’applique :
10 ― Je me repens quant je fis onques homme.
Lasse ! encor craim que ne soie dampnee
Par les faulx sors de divinacion
Ou j’ay creu contre la loy donnee,
Et laissié Dieu, par invocation
15 Des mauvais ars, querir election
Des jours qui sont dampnéz en l’authentique,
Les cuidier bons, chose[1] dyabolique.
En grant partie en fut destruite Romme.
De ce dist Dieux, pour tel voie erratique :
20 ― Je me repens quant je fis onques homme.
A Lucifer suy trop habandonee
Car tout orgueil est en elacion, 338a
En mon pais vaine gloire est fondee,
Convoitise fait la sa mension,
25 Les mauvais ont la dominacion,
Les bons n’ont rien. Chascun fiert, point et pique,
Pour robe avoir de nouvelle fabrique.
Le bien commun le plus puissant assomme,
Et pour telz maulx dist Dieux que l’en duplique :
30 ― Je me repens quant je fis onques homme.
Prince, approuchier voy ma mutacion,
Dont tu seras en desolacion
S’a repentir Nynive ne te somme.
Corrigons nous en grant contricion,
35 Ou Dieux tendra ceste conclusion :
― Je me repens quant je fis onques homme.
[1] Ms. et chose
