Balade 844 : Douze heures sont de jour, autant de nuit (MCCXLI)
Douze heures sont de jour, autant de nuit, 337b
Dont chascun a asséz la congnoissance
Ou doit avoir, mais a ce qui le nuit
Ne pourvoit nulz, ne met bonne ordonnance.
5 Car de mourir est po de souvenance.
Si voit chascun mainte tumbe au moustier
Ou telz gist mort qui vivoit encore hier,
Par accident ou par mot de nature,
D’aage trop grant qui le fait desvier :
10 Mais je n’en voy amender creature.
Car par pechié convoiteux sont destruit,
Maint qui de mort soufrir n’ont esperance.
La court des grans est uns essains qui bruit,
Comme mouches, en trop grant habondance,
15 Puis vient un vent qui les destruit et lance
Soudainement, et les fait perillier.
De nostre temps le pouons avisier
En divers lieux, et par saincte Escripture,
Dont l’en se dust moult tenir de pechier :
20 Mais je n’en voy amender creature.
Convoitise a en maint royaume induit
Les grans estas, male perseverence
Et povreté, qui le peuple conduit,
Car bien commun n’est plus en remembrance.
25 Mais li vray Dieus qui reserva vengence,
Quant son peuple voult avoir roy premier,
Dessus leurs roys et sus leur foul cuidier
Par cas soudains pugnira leur injure.
Notons ce mot, que maint comparront chier :
30 Mais je n’en voy amender creature.
Prince, on ne fait chascun jour que preschier
Qu’om se vueille de pechiéz[1] despechier,
Pour paradis avoir, qui tousjours dure,
Mais diables vient toudis pour l’empeschier,
35 Qui en fait mil en Enfer tresbuschier.
Mais je n’en voy amender creature.
[1] Ms. ses piechiez
