Balade 842 : Vous me demandéz qu’il me semble (MCCXXXIX)
Vous me demandéz qu’il me semble
De ce monde : mauvaisement.
Chascuns qui puet y pille ou emble,
Nulz n’y craint Dieu piteusement,
5 L’Eglise n’a soustenement.
Par les gens d’elle se destruit,
Clergie et science s’en fuit
Et la princé veult tout avoir,
Convoitise est en son grant bruit,
10 Car nulz ne fait bien son devoir.
Le bien commun de paour tremble
Qui n’a point de defendement.
Chascuns qui puet argent assemble.
Sanz regarder quoy ne comment,
15 Justice n’a gouvernement
Et l’un voicin a l’autre nuit, 336d
Foy ne loy n’ont nul sauf conduit,
Pour ce ne s’osent apparoir,
Non pas encor aler de nuit,
20 Car nulz ne fait bien son devoir.
Ce monde au premier ne[1] resemble,
Ou paix fut continuelment.
Chevalerie se dessemble,
Chascuns vit orgueilleusement,
25 Religion non castement,
Chascun a mal faire se duit,
Et tous vices sont introduit
Tant que tout se doit remouvoir
Et changer royaumes, ce suit,
30 Car nulz ne fait bien son devoir.
Princes, je tien certainement
Que tout se changera briefment.
Je voy les hauls seigneurs mouvoir.
35 Tout s’en rira en Orient
Dont tout vint au commencement,
Car nulz ne fait bien son devoir.
[1] Ms. me
