Balade 840 : Saint Denis, saint Georges, saint Blaise (MCCXXXVII)
Saint Denis, saint Georges, saint Blaise,
Saint Cristofle, et aussi saint Gile,
Saincte Katerine, or vous plaise,
Saincte Marthe et saincte Cristine,
5 Saincte Barbe et saincte Margrite, 336a
Avoir tousjours de moy memoire,
Ainsi comme il est chose voire
Que Dieux a vous .x. octroya
Que quiconques vous requerra
10 De bon cuer, par priere honneste,
En quelque peril qu’il venrra,
Dieux essaucera sa requeste.
Pour lui mourustes a mesaise,
Pour sa loy, et en mainte ville
15 Blamastes l’orde loy mauvaise,
Preschans par tout son evangile,
Convertissans de gens cent mille.
Par martire avéz eu sa gloire
Les pluseurs, et tant feistes croire
20 De peuples qui pour lors erra,
Qu’entre sains et sainctes sera
Voz noms hauciéz, car en tempeste
Et tous maulx, qui a vous courra
Dieux essaucera sa requeste.
25 De vous louer nulz ne se taise :
Prier et servir sanz perice
Vous doit chascun qui veult estre ayse
Pour remouvoir de lui tout vice.
Donnéz moy donc faire service
30 […]
[…][1]
A vous tous qui mestier en a,
Si que quant mes corps finera,
En paradis soit m’ame preste,
35 Car qui vo nom en pri[e]ra,
Dieux essaucera sa requeste.
Princes, roys, dus, entendéz ça,
Tous pecheurs, et qui mal traira,
De requerir ces sains s’apreste. 336b
40 En quelque peril qu’il l’ara[2],
A sa priere ne fauldra :
Dieux essaucera sa requeste.
[1] Vers manquants
[2] Saint Hilaire crrige en sera
