Balade 839 : Sçavéz vous la cause pour quoy (MCCXXXVI)

                        Sçavéz vous la cause pour quoy,
                        Quant aucun tue son pourcel,
                        A ses voisins en fait envoy
                        Et leur en donne maint morsel
5                      De l’eschine, du haterel,
                        Des boudins, d’autres laridiaux,
                        D’andouilles, jambons, des nonbliaux,
                        Du soult que l’en prangne en gré prie ?
                        Pour ce que trop a fait de maulx :
10                    Pourcel ne fist bien en sa vie.

                        Pors se boutent en un aunoy,
                        En un jardin, en un prael,
                        Tout gastent et font tant d’annoy                                                     335d
                        Qu’il n’en est a nul homme bel.
15                    Ilz boutent par tout leur musel,
                        Vignes, blez fouillent, poys, naveaulx,
                        Enfans estranglent es berseaulx.
                        Chascun les court sus et escrie,
                        Tant sont mauvais et desloyaulx :
20                    Pourcel ne fist bien en sa vie.

                        Qui plus est, de vendre n’ont loy
                        Juifs. Sarrasins n’en font tropel.
                        Nul temps mangier ne leur en voy
                        Car seursemé sont et mesel.
25                    Deffendu leur est sur leur pel
                        Qu’ilz ne mangussent. Telz morsaulx
                        S’envoy’on pour appaisier ceaulx
                        Ausquelz ilz ont fait villenie
                        De leurs membres et leurs boyaulx :
30                    Pourcel ne fist bien en sa vie.