Balade 838 : Quant j’oy mon aage premerain (MCCXXXV)
Quant j’oy mon aage premerain,
Entre mes .xv. et .xiv. ans,
Les pommettes avoir ou sain,
Rondes, dures, fermes, poingnans,
5 Corps faitis, jolie et chantans,
Viaire cler, voix douce et saine,
En touz esbas la premeraine
Qui se faisoient par honour,
Et par marier suy en paine :
10 Onques femme n’ot tel dolour !
Aux festes me tendoit la main
Chascun, de m’amour fut engrans,
Or suis donnee a un villain
Qui est uns rudes paisans,
15 Rebours, rebelles, desplaisans.
De lui ay eu la pance plaine
Pluseurs foiz, s’en suy lasse et vayne.
Tettes ay com soufléz d’un four,
Aussi plates c’une quintaine : 335c
20 Onques femme n’ot tel dolour !
Mon premier temps regrette et plain,
Povre femme, plaine d’enfans.
A marier ne fait pas sain.
Povres hommes, femmes servens,
25 Qui riens n’ont plus, font que meschans
D’eulx asservir, car chascun maine,
Eulx mariéz, vie griffaine,
Batent et tancent a leur tour.
Ce me vault pis que mort soudaine
30 Onques femme n’ot tel dolour !
Prince, je suy seure et certaine
Que marier serre la vaine
Et fait perdre force et coulour
A pluseurs. J’en porte l’ensaingne.
35 Pour ce a non marier enseigne :
Onques femme n’ot tel dolour !
