Balade 837 : Qui a filles a marier (MCCXXXIV)
Qui a filles a marier
Il doit a son fait avertir,
Terre et argent leur doit baillier,
S’il peut, sanz nopces ne vestir.
5 Au fort, ne se doit consentir
Qu’il baille bourses ne joyaux,
Espignliers, saintures, chapiaulx.
Face ent le mary pourveance,
Car j’en ay veu plusieurs de ciaulx
10 A tart venir a repentence.
Il fault grans robes de drap chier,
Pluseurs courtes, l’estat tenir
Des fourrures au peletier,
Laitices, aler et venir
15 Pour boutonures retenir[1]
De perles, couronnes, anneaulx,
Pour les nopces divers morceaulx,
Vins et grains en grant habondance :
D’ainsi faire ay veu pluseurs d’yaulx
20 A tart venir a repentence.
Mieulx vault tousjours au commencier
Terre a sa fille departir
Ou argent, pour s’en depeschier
A une foiz, que tant querir
25 De choses. L’en n’en puet yssir.
Noces sont de trop grans reveaulx. 335b
Pere et gendre facent entr’eaulx
En commun la feste et la dance.
Les faisans seulz, vy des plus haulx
30 A tart venir a repentence.
Princes, grans nopces font vuidier
L’argent, la granche et le celier.
Fouls est qui du faire s’avance,
Car les saiges les vont mangier,
35 Et s’en voy maint au derrenier
A tart venir a repentence.
[1] Ms. e retenir
