Balade 836 : Lasse ! donnéz moy une offrande (MCCXXXIII)
Lasse ! donnéz moy une offrande 334d
En l’onneur la Vierge Marie !
― Et je la vous octroy, traunde.
Arse soiéz ou enfoye,
5 Car messe ne puet estre oye
<Par vostre ennuy en cest moustier.
Il n’y a ribault ne houlier,>[1]
Coquin, truant ne maquerelle,
Qui ne soit tousjours en chapelle,
10 Pour mailles et deniers avoir.
Vuidéz hors, qui ne vous appelle :
Que l’en vous puist trestouz ardoir !
Il n’y a paillart ne gourmande
Qui ne viengne les gens sachier
15 En l’eglise, c’est grant esclande.
L’en ne s’i puet agenoillier
Qu’il n’en ait devant et derrier.
L’un tent sa main, l’autre s’escuelle,
Puans comme une orde ruelle.
20 Larrons a Dieu, faictes devoir,
Ouvréz, gaingnéz sur vostre selle :
Que l’en vous puist trestouz ardoir !
A tout le moins, qui ne vous mande,
Au portal soit vostre establie,
25 Par dehors, sur paine d’amende :
Ou seréz en place establie,
Sanz aler tel conestablie
Au moustier ou maint s’atropelle,
Ou vous en paieréz la gabelle.
30 Hors du moistier devéz seoir
Sanz dedenz faire l’estenelle :
Que l’en vous puist tresetous ardoir !
Gens de l’eglise, on doit purgier 335a
D’entrer enz tout paillart, loudier,
Truandes n’y doyvent manoir.
Faictes les donc bien corriger.
Truans, il vous convient vuidier,
Que l’en vous puist trestous ardoir !
[1] Vers surnuméraires
