Balade 834 : Vielle, laide, barbue et diffamee (MCCXXXI)
Vielle, laide, barbue et diffamee,
Orde en tous cas, desplaisant et baveuse,
Qui le cul sec n’eustes onques journee
En jeune temps, et viel luxurieuse,
5 Vous estes trop de parler oultrageuse
En mesdisant sur les femmes de bien.
La monstréz vous que vous ne valéz rien
Et que tousjours avéz esté mauvaise.
Aléz vous ent, vous puéz comme un chien :
10 Le feu d’Enfer puist ardoir vo fournaise !
En mains pais avéz suy l’armee
Et non mestier, n’en soiéz ja honteuse,
Prins et plumé, dont vous seréz dampnee, 334b
Comme vielle sur toutes convoiteuse,
15 Maint soudoier et fait sa bourse creuse.
Prestres et clers attrait a vo lien.
Or est usé tout vostre cuirien,
Chascuns vous fuit, dont vous n’estes pas ayse.
Aléz desor chanter le Requiem :
20 Le feu d’Enfer puist ardoir vo fournaise,
Qui tant a fait du cu puant[1] fumee,
Dont maint sont mort. Vielle contagieuse,
Vouléz vous [donc] gouverner la contree,
En beguinant faire la precieuse,
25 Pour empescher toute vie amoureuse ?
Ardoir puist l’en femme de tel merrien !
Jamais n’aréz ribaut ne rutien
Pour vous aisier, vielle, ne vous desplaise.
Prenéz en gré vostre temps ancien :
30 Le feu d’Enfer puist ardoir vo fournaise !
Prince d’amours, tel vielle forsenee
Voist en exil, a tousjours condempnee
Par vostre court, car nul plus ne s’en aise,
Ou sur le moins ait la langue coupee.
35 Si aréz vous, fausse vielle enragee :
Le feu d’Enfer puist ardoir vo fournaise !
[1] Ms. puante
