Balade 833 : Pour Dieu, donnéz maille ou denier (MCCXXX)
Pour Dieu, donnéz maille ou denier
A ce povre qui ne voit goutte !
― Va t’en sanz chandoille couchier,
D’ardoir ton lit es hors de doubte.
5 ― Ha ! sire, je ne menus goute.
Aler ne puis par maladie !
― Tu ne doiz donc point de chaucie,
Saint Mor ne te fera fremir.
― Sire, je ne [me] puis gesir :
10 Donnéz moy pour avoir du pain !
―Tu as d’estre droit bon loisir,
Atten encor jusqu’a demain.
― A ! sire[1], ne puis endurer,
Mon chief pers, le bras et le coutte.
15 ― Du coustel ne pourras frapper,
D’amende paiéz n’aiéz doubte.
― A ! sire, j’ay la jambe route.
― Or fay qu’elle soit reboulie :
Pran aucun drapel, si la lie.
20 ― Sire, je ne faiz que languir,
Donnéz moy ! ― Pense de mourir,
Tout seroit perdu en ta main.
― Helas ! vueilléz moy secourir !
― Atten encor jusqu’a demain.
25 ― Saint Anthoine me vent trop chier
Son mal, le feu ou corps me boute. 334a
― D’achater buche n’as mestier :
Fay ton lit en Seine et ta couste
Pour refroidier. ― Sire, j’ay goute
30 De saint Mor. ― Ne la retien mie.
― Sire, je suy en frenaisie !
― Donques te doit chascuns fuir.
― Doulz sires, j’ay tant a souffrir
Que je ne dor ne soir ne main,
35 Vueilléz moy quelque chose offrir !
― Atten encor jusqu’a demain.
― Princes, je ne me puis aidier !
― Nulz [ne] te doit donc avoir chier,
Car l’en te feroit bien en vain.
40 ― Sire, j’ay le mal saint Riquier,
Donnéz moy, pour Dieu le requier !
― Atten encor jusqu’a demain.
[1] Ms. doulz sires
