Balade 832 : De tous les maulx de quoy Dieux puet garir (MCCXXIX)
De tous les maulx de quoy Dieux puet garir 333c
Et de tous ceuls dont sains sont reclaméz,
De la fouldre qui fait maisons bruir,
De la gresle quant le temps est geléz,
5 De la pluie quant li airs est crevéz,
Du tonnoirre, de noif, [et] d’ochelitre,
Et de tous ceuls desquelz l’en seult benistre,
Des malveillans, soient destruis et prins
Ceuls qui des maulx [des sains] se donnent titre :
10 Ribauls, paillairs, truandes et coquins.
D’orrible mort puisse[1] chascuns mourir,
Par tout soient hauz et diffaméz,
Chiens enrragiéz leur puissent sus courir,
Fuitis soient de l’eglise et chaciéz,
15 Et au gibet panduz et trainéz,
Et comme faulx aient de papier mitre,
Pour escheler par le bourriau ou mittre.
Comme larrons a Dieu : tel soit la fins,
Ceuls qui des maulx des sains se donnent titre,
20 Ribaulx, paillars, truandes et coquins.
Car l’on ne puet au moustier messe oir
Pour leur annuy, tant sont fort emparléz
De faindre maulx, d’aumosnes requerir.
Chascun est la par leur fait deboutéz.
25 Ils sont puissans, larrons, atruandéz,
Oyseux, faillis, dont nul bien ne puet ystre.
Pour amender leur donne ceste epistre,
Dont mains prisiéz seront des gens latins
Ceuls qui des maulx de sains se donnent titre,
30 Ribaulx, paillars, truandes et coquins.
O colleges, chanoins et curéz, 33d
Moines, prieurs, abbesses et abbéz,
Tous mendiens, chartroux et celestins,
Coustres, patrons es villes et citéz,
35 A bons batons de voz moustiers fustéz
Ribaulx, paillars, truandes et coquins.
[1] Ms. puist
