Balade 831 : Helas ! tant com je fu moinés (MCCXXVIII)
Helas ! tant com[1] je fu moinés
Et que j’aloye sus et jus,
Et que j’oy comme maint moinés 33b
Queue roide et tesmoings velus,
5 J’estoie par tout bien venus.
En jeunesse fis mes aviaulx,
Par tout courir comme uns toriaux,
Querir pasture et oy aisier :
Or suis devenus coulombiaux :
10 Je ne puis mais fors que baisier.
Servir ne sçay des premiers més,
Pour ce voy qu’om ne m’aime plus.
Respandus est tous mes broués,
Tout me va ce dessoubz dessus.
15 Mes pendans sont longs devenus,
Mole est ma queue et mes boyaulx,
Mes culs grailes comme uns fusiaulx
Tant que fame ne m’a plus chier,
Car quant suy entre leurs trumiaulx,
20 Je ne puis pais fors que baisier.
J’ay tresbonne voulenté, mes
La force et pouoir sont perdus,
Car tendre ne veult mes harnés.
Ains suy par goutes confondus,
25 Tousseux, enruméz, enfondus,
Je n’ay que le cuir et les piaulx.
Qu’est devenuz li larronciaulx,
Qui ne [me] sert fors de picier ?
Mangiéz fust il or des corbiaulx !
30 Je ne puis mais fors que baisier ?
Princes et maistres des ribaulx,
Pour une foiz .xiiii. en faulx
Je ne puis plus faire mestier,
Jouer ne puis des cannebaux,
35 Femmes ne craingnent mes assaulx :
Je ne puis [mais fors que baisier.]
[1] Ms. comme
