Balade 826 : Adviséz vous, toutes gens de pratiques (MCCXXIII)
Balade sur la reformacion et maladie de ceuls qui ont prins excessivement la monnoye du peuple
Adviséz vous, toutes gens de pratiques,
Marchans d’argent, exigeurs de finance,
Qui en estes devenus ydropiques :
Purgier vous fault, vivre par ordonnance,
5 Car le trop prins vous met en grant balance.
Si vous convient, pour vo santé ravoir,
De voz excés faire la penitence :
Les medicins le vous font tuit sçavoir.
En excedant despistastes phisique,
10 Povres et nus, de petite apparance,
Prenans par tout, par fole voie inique,
L’or et l’argent a trop grant habondance.
Or fault ce trop avec toute sustance,
Pour vous pugnir, oster et remouvoir,
15 Et retourner a vo premiere dance :
Les medicins le vous font tuit sçavoir.
Telz excés font homme paralitique,
Trembler, fremir, perdre toute puissance,
Et en la fin devenir vray ethique
20 Par ce qu’il n’a vescu a souffisance. 332a
Et ce sceurent bien maint malade en France,
Qui par default de non faire devoir
Sont en peril qu’ilz ne muirent en trance :
Les medicins le vous font tuit sçavoir.
L’envoy
25 Prince, foulz est qui a prandre s’applique
Plus qu’il ne doit sur la chose publique,
Car il en fault rendre compte ou devoir
Et en la fin par droit oy voye oblique
Estre desert ou deshonouré, si que
30 Les medicins le vous font tuit sçavoir.
