Balade 824 : Ne prans riens d’autrui ne reçoy (MCCXXI)
Balade pour vivre liement en ce monde pour le corps et l’ame
Ne prans riens d’autrui ne reçoy,
Lors ne te faudra rendre compte.
De ton labour mangu et boy, 331b
Vy liement et riens n’acompte
5 A grant estat, fuy dueil et honte,
Ayme Dieu, pran en pacience,
Soyes de bonne conscience,
Pour ta santé n’espargne rien,
Vi tousjours en obedience,
10 Tien toy de mal faire et fay bien.
Ne t’empesche contre la loy,
Convoitise ne te surmonte,
Tien par tout loyauté et foy,
Et ne te chaille qui hault monte :
15 Qui de plus hault chiet plus s’afronte,
Moien tenir est grant science
A tout homme, avoir diligence
De son fait et garder le sien.
Donne en temps et lieu, c’est prudence.
20 Tien toy de mal faire et fay bien.
Au temps qui court ne parle n’oy,
Des faiz mondains rien ne raconte,
Soyes sourt, aveugle, et me croy,
Sur ces poins ton couraige dompte.
25 A parler n’aies bouche prompte,
Seufre, escoute, sanz aliance
Avoir a nul, impacience
N’ait en toy son cotidien :
Pour le regne avoir d’excellence,
30 Tien toy de mal faire et fay bien.
L’envoy
Prince, au jour d’ui tout muer voy
De mal en pis, orgueil, desroy,
Hayne et envie de chien. 331c
Chascun porte l’estat de roy,
35 Mais pour amender ton arroy,
Tien toy de mal faire et fay bien.
