Balade 822 : Vive chascun qui puet joieusement (MCCXVIII)
Balade comment chascun qui puet doit vivre joieusement et eschiver tristesce
Vive chascun qui puet joieusement
Sanz toy troubler pour chose qui avaingne,
Et en tous cas se porte loyaument,
Qu’il aime Dieu et qu’il le serve et craingne,
5 Vive du sien, rien de l’autrui ne praingne,
Soit paciens, ait en lui souffisance,
Des biens qu’il a vive par ordonnance, 330c
Sanz exceder, fuie fole largesce,
Euvre des mains, ait en Diue s’esperance,
10 Car don de Dieu est de vivre en leesce.
Qu’om face bien et que moiennement
L’en ait estat qui a soy appartaingne,
Non excessif, de robes n’autrement,
De pourveoir son hostel li souvaingne
15 En temps et lieu, et chascune sepmaine
Examine ses gens, sa pourveance,
Face plaisir a tous de sa puissance,
De mauparler sur autrui ne se blessce,
Syve les bons, soit joyeus des s’enfance,
20 Car don de Dieu est de vivre en leesce,
Qui fait durer tout homme longuement,
Grant aage avoir, et tristesce le maine
Par son ardeur a fin soudainement.
Convoitise des biens mondains n’enpraingne.
25 S’il a asséz, d’acquerir se refraingne,
Sanz grant estat vive en equipolance,
Si qu’envie ne le fiere ne lance.
Soit vertueus, fuye toute paresce,
Vive tousjours en joie et en plaisance,
30 Car don de Dieu est de vivre en leesce.
L’envoy
Prince, homs ne doit vivre dolentement
Pour bien perduz, pour mort, pour changement,
Mais en tout cas a Dieu tourt et s’adresce.
Prangne en bon[1] gré et vive liement.
35 Pour faire dueil n’en seroit autrement,
Car don de Dieu est de vivre en leesce.
[1] Ms. bonne
