Balade 821 : Qui regarde bien vo phillosomie (MCCXVI)
Sote chançon en balade d’une vielle merveilleuse
Qui regarde bien vo phillosomie 329d
Et vo gent corps fait a une coignee,
De toute amour et d’amer s’entroublie,
Car plus laide ne fut de mere nee.
5 D’un cahuant fustes poste et couvee,
Oeulx de torel et bouche de lymier,
Grosses lefres pour gelines jouchier,
Joes comme a trompeur qui soufle et muse.
Dignes n’estes pas d’avoir un porchier,
10 Dens de serpent, orde, laide et camuse.
Les crins avéz plus noirs que cramillie,
Visaige d’ours, langue desordonnee,
Baveuse aussi, janglant comme une pye,
Bras cours et gros, pance de bran enflee.
15 Vous estes bien de tettes acesmee
Qui vous pandent devant jusqu’au brodier.
Mais au surplus avec un poitronnier
Noir et hideux, qui onques ne s’excuse
De pez, vesses, ordure et bran baillier,
20 Dens de serpent, orde, laide et camuse.
Eureux seroit qui aroit tele amie.
Il en ystroit [trop] noble progenie
Dont les enfans aroient chiere lie
Pour repeupler leur caterve dampnee.
25 Se Lucifer n’avoit femme espousee,
A lui vous doing, cil vous ara moult chier,
Car nul fors li vouldroit a vous touchier.
Vous li jourréz de vostre cornimuse,
Ne le vueilliéz a mari reprouchier,
30 Dens de serpent, orde, laide et camuse.
L’envoy
Dame, qui fait toute amour estrangier,
Nul ne pourroit vo laidure jugier,
Car qui vous voit, arrier s’en trait et ruse.
Tous les diables vous puissent netoyer,
35 Car vos regars fait les gens enrragier,
Dens de serpent, orde, laide et camuse.
