Balade 818 : Ouéz trestous le juge du grant roy (MCCXII)
Balade sur la prophecie de Sebile de la vengence des pecheurs
Ouéz trestous le juge du grant roy
Par la bouche Sebile, la prophete,
Vous, crestiens, vivans par grant desroy
En l’ort pechié de quoy Sodome trette,
5 En sors mauvais dont l’en use a Tholette,
Ars deffenduz de Dieu et loy divine,
Cuers plains d’orgueil, car brief vient le termine
Que vous seréz du tout executé,
Par guerre avoir, mort soudaine et famine,
10 Par le default d’amour et charité,
Et par tempest. Ces .iiii. tourmens voy
Pour ces .iiii. pechiéz que l’en recepte
Mil.iiiie. trois, .iiii. et cinq perçoy
Pugnicion qui en doit estre fette
15 Horriblement, mainte cité deffette,
Maint prince mort et monarchie encline
A changement, car vertu se decline,
Division, faintise et lascheté
Regnent partout. Si faut que joye fine 328d
20 Par le defaut d’amour et charité.
Car en ce temps, pour l’erreur de la foy
Et le vice de la loy trop detrecte,
Que nul ne tent a bien, fors que pour soy,
Qu’entre les gens sourdra nouvelle secte
25 Et voulenté, justice non parfette,
Vengence lors vendra toute enterine
Qui destruira des mauvais la racine
Par qui le bien commun est deserté.
Ou ciel seront et en terre maint signe
30 Par le default d’amour et charité.
L’envoy
Prince et baron, peuple et clergé, cil troy,
Adviséz vous, soiéz humbles et coy,
Aiéz des corps et des ames pité.
Criéz merci a Dieu par bon arroy
35 Que vous n’aiéz d’enfer le dur courroy,
Par le default d’amour et charité.
