Balade 817 : Princes, barons et toute seignourie (MCCXI)

Balade comment les victoires des batailles sont en la main de dieu, non pas des combatans

                        Princes, barons et toute seignourie,
                        Subgiéz a Dieu de sa creacion,
                        Peuples regens, qui avéz mort et vie
                        Et qui souffréz doleur et passion
5                      Comme les gens de povre nascion,
                        En voz regnes n’aiéz trop grant fiance,
                        Sanz Dieu doubter, sans bonne conscience.
                        Cilz deppose les puissans de leur lieu,
                        Force n’y vault, bataille ne puissance :
10                    Les victoires sont en la main de Dieu.

                        Car qui le sert et vers lui s’umilie
                        De cuer parfait, par vraie entencion,
                        En gouvernant par bonne policie,
                        Et justement, sanz nulle fiction,
15                    Cilz a de Dieu grace et remission.
                        Mais cilz qui fait en mal perseverence,
                        Sanz repentir, doit avoir grant doubtance,
                        S’il se combat. Ce monstrent li Hebrieu :
                        Le grant nombre ne fait pas la vaillance,
20                    Les victoires sont en la main de Dieu,

                        Qui veult souvent la gent estre pugnie
                        De pires d’eulx, par une mocion
                        Soudainement venue et acomplie,
                        Par viel pechié en obstinacion,
25                    Et ainsi prant Dieu la pugnicion
                        Des malfaicteurs. Doubtons tuit sa vengence,
                        Fuions orgueil, venons arepentence,
                        Car par pechié ont trop perdu li Grieu :                                            328c
                        Ne nous fions en bataille a outrance,
30                    Les victoires sont en la main de Dieu.