Balade 816 : L’en voit les cers naturelement muer (MCCX)
Autre balade de ce meismes
L’en voit les cers naturelment[1] muer,
L’an une foiz, le merrien de leurs testes,
Et leur souffist un an cellui porter 328a
Sanz changement. Mais les dames sont prestes
5 D’entrechangier aux jours communs, aux festes,
L’abit des chiefs en estrange maniere,
Faire un auvent com ceuls qui font verriere,
Qui leur cueuvre leurs visaiges devant,
Piet et demi, et semble a leur visiere
10 Qu’elles aient le chief d’un cahuant.
Grant merveille est que d’elles regarder,
Car cornes ont trop plus longues que bestes,
Tant qu’om ne puet leur doulz viaire cler
Vir. Trop y a d’espingles et d’arestes,
15 De cheveulx mors, de bourriaux et de crestes,
Et tant de ploiz et devant et derriere
Que l’en prandroit d’assault une barriere
Ainsi qu’om se pust pour baisier traire avant.
Si semble a maint qui ont leur amour chiere
20 Qu’elles aient le chief d’un cahuant.
Vielles seulent ainsi leur chief hourder,
Qu’om ne voie leurs frances deshonnestes,
Mais les jeunes n’en doivent pas user,
Qui belles sont, gracieuses, honnestes.
25 Face couvrir leur est uns droiz tempestes
Pour leur beauté. Nulle tel atour quiere,
Soit condempnéz et mis en une biere
Si que portéz ne soit doresnavant,
Sanz dire plus, ou temps ça en arriere,
30 Qu’elles aient le chief d’un cahuant.
L’envoy
Prince d’amours, Juno, dame d’amer,
Ce lourde atour ne laissiéz plus regner
Sur les dames, soiéz loy condempnant.
L’umble joli faictes renouveller,
35 Tant qu’om ne puist desormais murmurer 328b
Qu’elles aient le chief d’un cahuant.
[1] Ms. naturelement
