Balade 815 : Atournéz vous, mes dames, autrement (MCCIX)
Balade sur l’estrangeté de l’atour et du chief que pluseurs dames font a present
Atournéz vous, mes dames, autrement,
Sanz emprunter tant de haribourras,
Ne de querir cheveulx estrangement
Que mainte fois rungent souris et ras.
5 Vostre afubler est comme un grant cabas,
Bourriaux y a de coton et de laine,
Autres choses plus d’une quarentaine,
Frontiaux, filéz, soye, espingles, et neux.
De les trousser est a vous tresgrant paine :
10 Rendéz l’emprunt des estranges cheveux.
Faictes vo chief des vostres proprement,
Sanz faire ainsi la torche de pesas,
Sanz adjouster estrange habillement 327d
Que destrousser fault, com jument a bas,
15 Chascune nuit, et getter en un tas,
Puis au matin fault retrousser s’ensaigne,
[Et] aide avoir. L’euvre d’une sepmaine
Y convient bien, et qu’om soit deux et deux
A ce trousser : pour tel chose villaine,
20 Rendéz l’emprunt des estranges cheveulx.
Onques ne fut si lourde afublement
Ne si cornu. Visaiges fait de chas,
Et si desplaist a tous communement
Tel chief fourré d’estrange chanvenas.
25 Cornes portéz comme font les lymas.
Atournéz vous d’une atournure plaine,
De vostre poil, d’autre ne vous souviengne.
Ostéz du tout ces grans hueres de leux
Qui vous deffont. Nulle plus ne les praingne :
30 Rendéz l’emprunt des estranges cheveulx.
L’envoy
Jeusnes dames, tele triquedondaine
Ne portéz plus. Aux vielles en conviengne.
Soit voz atours humbles et gracieux,
Plaisans a touz. Dieu en bien vous maintiengne,
35 Car raison dit, qui veult que tout la craigne :
Rendéz l’emprunt des estranges cheveulx.
