Balade 814 : Qui regardast les diz de Salemon (MCCVIII)
Balade du restablissement de la sustracion
Qui regardast les diz de Salemon
Au commencier de quelconque besongne,
Feist saigement, que son propos fust bon
Et que la fin ne lui donnast vergongne.
5 Ce fust bien fait, mais maint sont en essongne,
Qui ne pensent fors au commencement,
Du moien mal et pis du finement,
Dont il s’ensuit dure conclusion.
Or vueille Dieux qu’il aviengne autrement
10 Que je ne voy de la sustracion !
Car grant chose est de reprouver ce qu’on
A approuvé, droit divin le tesmongne,
Et quel l’en a publié en sermon,
Tenu pour saint, obey sa personne,
15 En tous estas, com saint Pierre de Romme,
Et par long temps, et puis soudainement
L’avoir soustrait de son gouvernement
Et restabli, sanz avoir union.
Mieulx face Dieux du restablissement
20 Que je ne voy de la sustracion !
Loist il ainsi faire et deffaire ? Non.
En tel peril, que tout saige ressongne,
Pour acquerir d’inconstance [le] non.
Certes nenil. Nul tel conseil ne dongne, 327c
25 Car des faisans chascun d’eulx s’en vergongne,
Et de l’ame vit l’om doubteusement,
Et ne voy pas [la] maniere comment
L’en puist venir a sa[1] perfection
De l’unité : mieulx y soit Dieu faisant
30 Que je ne voy la sustracion !
L’envoy
Princes, courons a Dieu benignement
Et supplions de cuer treshumblement
Qu’il nous oste ceste division
Et nous doint chief qui nous puist sainctement
35 Mieulx ame et corps gouverner a present
Que je ne voy de la sustracion !
[1] Saint Hilaire corrige en la
