Balade 813 : Je ne sçay royaume au jour d’ui (MCCVII)

Balade comment toutes choses vont en l’empire au jour d’ui

                        Je ne sçay royaume au jour d’ui
                        Terre ou pais, qui n’apovrisse.
                        Fors un dont trop esbahis sui
                        Ou il a eu long temps esclipse,
5                      Guerre, rumour, division.
                        ― Qui est il ? En confession
                        Le veilléz nommer ou descripre.
                        ― Voulentiers. A m’oppinion,
                        Toutes choses vont en l’empire.

10                    Le clergié, la princé y truy.
                        J’y voy transporter maint office,
                        Et justice avoir son refuy.
                        Loyauté, verité y glice.
                        La se doit traire l’union,
15                    La vont, de mainte nascion,
                        Ouvriers, marchans, et pour voir dire,
                        Tenéz ceste conclusion :
                        Toutes choses vont en l’empire,

                        Gens et bestiaulx, et s’i perçuy
20                    Cheminant Orgueil, Avarice.
                        Pluseurs grans estas y congnuy,
                        Et conseilliers plains de malice,
                        Mainte dissimulacion,
                        Maint vivre et mainte garnison,
25                    Et tant qu’il doit plus que souffire.
                        Riche sera la region :
                        Toutes choses vont en l’empire.

                        L’envoy

                        Prince, selon m’entencion,                                                                 327b
                        Doit venir grant mutacion
30                    Dont chascun se tendra de rire.
                        Point n’ay de consolacion
                        Quant dire oy tel perdicion :
                        Toutes choses vont en l’empire.