Balade 812 : Au roy, nostre sire, supplie (MCCVI)

Supplicacion au roy nostre sire

                       Au roy, nostre sire, supplie
                        Eustace que pour mieulx servir
                        Ses anciens servens n’oublie,
                        Que l’en doit ains la fin merir,
5                      Non pas leurs gaiges abolir,
                        Que desserviz ont en jeunesse
                        Pour secourir a leur viellesse
                        Et en vivre lors. Se me semble,
                        Qui ne le fait peche en noblesse :
10                    C’est de bien servir povre exemple.

                        Et pour ce convient qu’il vous die
                        Que .xxviii.[1] ans, sanz partir,
                        A servi a royal lignie
                        Vo pere et vous. Bien advertir
15                    Vous en pouéz. Lui retenir
                        Huissier d’armes voult la hautesce
                        De vo bon pere, et sa largesce
                        Lui donna a sa vie ensemble
                        Gaiges, estat que l’en lui cesse :
20                    C’est de bien servir povre exemple.

                        Mais il tient que ne vouléz mie
                        En tel cas voz servens souffrir
                        Deppointer de gaiges a vie,
                        Ordinaires, sur leur finir,
25                    Veu qu’il lui fualt sur ce tenir
                        Et garder Fymes, vo fortresce[2],
                        A ses fraiz, c’est ce qui le blesce.
                        Tout le cuer de paour li tremble,
                        Se vo pité ne le radresce :
30                    C’est de bien servir povre exemple.                                                  327a

[1] Saint Hilaire corrige en .xx. et.viii.

[2] Ms. forteresce