Balade 811 : Comment pourroit il avoir paix (MCCV)
Balade de divers plaiz qui sont chascun jour es cours de Compiengne
Comment pourroit il avoir paix
A Compiegne ? je ne sçay,
Car dix paires y a de plays
Infinis, que je vous diray :
5 Les plaiz du bailly, puis venrray
Aux plays de prevosté foraine,
L’exempcion de Compiengne,
Les plays du prevost de la ville,
Du vicaire de Saint Cornille,
10 De l’esleu, ceuls de Saint Clement,
Les plays des eaues et fourests
Et de Marigny ensement :
Oncques ne vi tant de procés. 326c
Appeler font prevosts gens lays
15 Devant eulx. S’en ont maint esmay,
Disans que piques et harnays
Ont porté. Aucuns dit[1] : ― Non ay.
L’autre dit : ― Je l’amenderay,
Qui bien veult rachater sa peine.
20 Pour espanter, l’autre se maine
En prinson, s’en sault croix et pile,
Et fault paier au coup la quille
Prevos, advocas chierement,
Et procureurs sont la tous prests
25 De mettre en court, ne chault comment :
Onques ne vi tant de procés.
Devant l’esleu vient pluseurs fais,
Pour les aides [tres bien] veu l’ay.
Es fourests se font les meffais
30 Et[2] es eaues. Lors sanz delay
Adjournent gens sergens a glay
En mains lieux, et font bourse plaine
De leurs rappors. Chascun se paine
D’avoir argent a fin civile.
35 On fait de .iiii. causes mile,
Escriptures de grant argent.
Oncques ne fut tant de hoqués
Qu’il y a, et finablement
Onques ne vy tant de procés.
L’envoy
40 Princes, duré a longuement
Ceste guerre civilement,
Et croy qu’el ne faurra jamés.
Chascun qui se va conseillant
A bon droit, s’en vient pour un cent :
45 Onques ne vi tant de procés. 326d
[1] Ms. dient
[2] Ms. Es
