Balade 809 : Qui aroit tout le monde a gouverner (MCCIII)
Balade comment santé est noble chose que aucuns gardent mauvaisement et eulx malades pour icelle ravoir doneroient toute richesce et seignourie
Qui aroit tout le monde a gouverner
Et tous les biens de ceste mortel vie,
Sanz querre avoir et sans riens excepter,
Force, beauté, renom, chevalerie,
5 Prouesce, honeur, dessus touz seignourie,
Et [puis] qu’il fust en l’aage de .xxx. ans,
Se maladie avoit qui lui fust grans,
Il donrroit tout, seignourie et avoir,
Villes chasteaulx, bugles et oliphans,
10 Mais qu’il peust bonne santé ravoir,
Que nul ne scet ou du moins veult garder,
Mais font pluseurs mainte gourmanderie
De trop veillier, de jouster, de dancer,
De prandre en eulx courroux, merancolie,
15 De faire en brief trop grant chevaucherie,
Du bas mestier frequenter estre engrans,
Boire a chascun, comme font les Normans.
Ce fait adonc fievre et mal concepvoir.
Chascun donrroit alors vignes et champs,
20 Mais qu’il peust bonne santé ravoir.
Mauvais se fait ainsi desordonner,
Car quant on sent son mal, on brait et crie,
En son lit fault tourner et retourner,
Le dos se duelt, les costéz, la vessie,
25 Foye et poumon, le chief en frenaisie.
Membre n’y a, rate, eschine ne flans,
Bras, jambes, mains, qui ne soient soufrans,
Estomas, piéz. Tant fault le corps doloir 326a
Que le soufrant donrroit cent mille frans,
30 Mais qu’il peust bonne santé ravoir.
L’envoy
Prince, bon fait sa vie a droit mener
Jusqu’a l’aage que nulz ne puet passer,
Sanz faire excés, pour telz maulx recevoir,
Par medicins et par fusique ouvrer.
35 Car qui mal a, il voudroit tout donner,
Mais qu’il peust bonne santé ravoir.
