Balade 808 : Qui veult paix et repos avoir (MCCII)
Balade du deduit et estrange melodie des oyseaulx demourans en la tour de Fymes ou Eustace des Champs demoura malades par.iii. moys qui nuit et jour en fut servis
Qui veult paix et repos avoir
En maladie et en destour,
Ce puet bien cilz apercevoir
Qui a Fymes gist en la tour.
5 Car la se logent tout autour
Choes, cahuans, estourneaulx,
Grans corbés, suettes, moyneaulx,
Qui sanz cesser y font grant bruit,
Aucuns de jour, autres de nuit.
10 C’est une estrange melodie
Qui ne semble pas grant deduit 325c
A gens qui sont en maladie.
Premiers les corbés font sçavoir
Pour certain si tost qu’il est jour :
15 De fort crier font leur pouoir
Le gros, le gresle, sanz sejour.
Mieulx vauldroit le son d’un tabour
Que telz cris de divers oyseaulx,
Puis vient la proie, vaches, veaulx,
20 Crians, moyans, et tout ce nuit,
Quant on a le cervel trop vuit.
Joint du moustier la sonnerie[1]
Qui tout l’entendement destruit
A gens qui sont en maladie.
25 A souleil couchant sur le soir
Deslogent de leur carrefour
Cahuans, suettes, pour voir,
Qui chantent chans plains de tristour.
Toute la nuit font grant freour
30 Aux veillans. De mort sont appeaulx.
Lors doubtent malades leurs peaulx.
Sages est qui tel logis fuit,
De dormir n’y a sauf conduit.
Puces font la dure escramie
35 Et tous les vens. C’est lieu mal duit
A gens qui sont en maladie.
L’envoy
Princes, saichent toutes et tuit
Qu’Eustace informé et instruit
Suy de tout ce que je publie
40 Par .iii. moys, dont li cuers me cuit.
C’est froit hostel et mal reduit
A gens qui sont en maladie. 325d
[1] Ms. lassonnerie
