Balade 807 : Avec santé vivre et vestir me donne (MCCI)
Autre balade comment nulz homs ne doit desirer ne demander en ce monde ne grant richesce ne grant povreté, fors vivre et vestir a la souffisance de sa vie
Avec santé vivre et vestir me donne, 325a
Sanz granz richesce[1] et sanz grant povreté :
Car trop riches a tous maulx s’abandonne
En oubliant toy, Dieu, et ta bonté.
5 Et le povre est en tous lieux despité
Et reprouchés de droit en tesmoinage[2],
Injuste en soy. Ce cause quant partaige
N’as fait a tous d’une chevance unie.
Car l’un a trop et li autres mendie.
10 Entre ces deux ne te quier autre avoir,
Fors seulement que je puisse a ma vie
Vivre, vestir, bonne santé avoir.
A ton plaisir sur ma requeste ordonne,
Sanz riens vouloir que ma neccessité,
15 Sanz mendier, sanz yssir hors de bonne,
Pour trop d’avoir ou nulz homs n’a pité
Du souffraiteux, lors pert felicité
Quant a l’ame. Monde est son heritaige
Tant comme il vit, mais Salemon le saige
20 Tel richesce ne [te] demanda mie
Ne povreté, mais qu’il eust en partie
Tant seulement son vivre a ton vouloir.
Pour ce, doulz Dieux, humblement te supplie
Vivre, vestir, bonne santé avoir.
25 Plus demander en doit nulle personne
D’estat moyen, et c’est a grant plenté,
Et qu’il euvre par entencion bonne
De l’art mondain que tu lui as presté,
Qu’il te serve de bonne voulenté 325b
30 Et ne tende jamais au hault estage
Ou il a trop de peril et de rage,
Ou corps se pert et l’avoir, par envie,
Souventefoiz. Qui pis est, l’en t’oublie.
Es grans estas ne fait nulz son devoir :
35 Pour telz perilz eschiver, je te prie
Vivre, vestir, bonne santé avoir.
L’envoy
Prince des cieuls, douce vierge Marie,
Octroiéz moy, avant que je desvie,
De vous servir voulenté et pouoir.
40 Autel faictes a ma povre lignie
Tant qu’avoir puist et sanz truanderie
Vivre, vestir, bonne santé avoir.
[1] Ms. richesces
[2] SaintHilaire corrige en tesmoinaige
