Balade 806 : Las ! qui ains vit si fausses traisons (MCC)

Balade de la mort du roy Richart d’Angleterre

                        Las ! qui ains vit si fausses traisons,
                        Parens, peuples qui furent ses feaulx,
                        Par toy, Henry de Lencastre, faulx homs,
                        Faictes en lui contre les droiz royaulx,
5                      Prandre et occir, par traiteurs consaulx
                        De magesté blecee ? Et ce retraire
                        Toy et les tiens fait au monde desplaire,
                        Tant que tuit roy crestien, Sarrasin,
                        Pour le bon roy vous seront adversaire
10                    Qui faussement as esté mis a fin.

                        Angleterre, sur toutes nascions
                        Es au jour d’ui haie pour tes maulx,
                        Et cilz qui tant a fait d’occisions
                        Des innocens pour regner comme faulx.
15                    Vous avéz fait en la loy deux deffaulx :
                        Nulz ne pourroit voz granz pechiéz retraire,
                        Perseverans, devéz crier et braire.
                        Destruis seréz. Vo prophete Merlin,
                        Bodes concluéz pour vo mort et haire
20                    Qui faussement a esté mis a fin.

                        L’envoy

                        Plouréz, Anglois, les tribulacions
                        Qui vous viennent, et voz destructions.
                        Pour voz pechiéz dit voz regnes : ― Je fin.
                        Franc estoc par les Bretons[1]
25                    Pour roy Richart dictes : ― Destruiz serons,
                        Qui faussement a esté mis a fin.

[1] Vers incomplet