Balade 804 : J’ay .xl. ans passé la quarantaine (MCXCVIII)
Balade du caresme.m.cccc. et deux qui fut tresgrevable a mainte gent
J’ay .xl. ans passé la quarantaine,
Maint dur karesme avec les .iiii. temps,
Qui ne me firent onc[1] le quart de paine
Que cilz ci fait pour ces mauvais harens,
5 Caqués et sors, jaunes, noirs et puens,
Mal ensaussés, viéz merlanz hors saison. 324b
Poys, feves chiers sont, et tuit ly poisson
De riviere, d’estans et de la mer
Riens ne valent. Nulz ne les doit amer
10 Ne au manger ne puis[2] prandre bons esme.
Ce qui fut doulz m’est pesant et amer :
De tout mon temps ne vi si dur caresme.
Car il est froit pour mars qui le pourmaine,
Et dangereus pour ver a maintes gens,
15 Et ceuls qui n’ont pas complexion saine.
Toutes choses se sont renouvellens
[…][3]
En cellui mois, plain de corruption,
Dont il s’ensuit mainte destruction
20 De pluseurs maulx, fievres qui font trembler
Et en la fin en l’autre secle aler.
Le pain se sent, et le vin est chier mesme
Tant qu’om ne puet de nul bien recouvrer.
De tout mon temps ne vi si dur caresme.
25 L’en n’a de mer poisson qui le cuer taigne,
Qui ne soit gros, deffendus et nuisens,
Seiches, rayes, hanons, pesche villaine,
Carpe, anguille, tanche, lymon flairens.
Uns malades en seroit hors de sens.
30 Si ne puet nulz faire provision
Pour sa santé. Encor huille et oignon
Se vendent roit, pour le peuple affamer,
Qui chascun jour ne fait que labourer :
Qui veult riens bon, il est plus chier que cresme,
35 Ne je n’y sçay nul remede trouver :
De tout mon temps ne vi si dur caresme.
L’envoy
Prince, on ne puet dehors n’en sa maison
Trover plaiz, soiles, rougés, saumon,
Luz ne carreaulx, brochez, brayne ne perche,
40 Lemproye aussi ne gournaut qui soit bon, 324c
Les maquereaulx, fors seulement leur nom :
De tout mon temps ne vi si dur karesme[4].
[1] Ms. onques
[2] Ms. puisse
[3] Vers non édité ou vers manquant non signalé
[4] Saint Hilaire corrige en caresme
