Balade 803 : Vous qui améz honeur, deduit, plaisance (MCXCVII)
Balade du noble et amoureux lieu appellé la table ronde hors Pontoise et de la belle veue et douce odeur des elemens qui l’environnent
Vous qui améz honeur, deduit, plaisance,
Et qui vouléz vivre joieusement,
Ou mois de Moy que toute amour s’avance,
Juing et Juillet et Aoust ensement,
5 Vous ne pouéz plus bel esbatement
Trover en lieu ne en place du monde
Hors Pontoise, ce voit on clerement,
Du[1] noble lieu dit a la Table Ronde. 324a
Ou les enfans qu’Amour tient en balance
10 Ont fait seigneur pour le gouvernement
De ce beau lieu, assis en cuer de France,
Ou le doulz air est continuelment,
Boys, eaue et prez, Oyse, vigne[2] ensement
Avoines, fruis, montaigne belle et monde.
15 Deduis d’oyseaulx sont anciennement
Ou noble lieu dit a la Table Ronde.
Le seigneur a en son obeissance
Officiers de noble entendement,
Et la vivent par tresbelle ordonnance.
20 Dames, seigneurs y convient souvent
A beaux soupers. La sont maint instrument,
Dancer, chanter, toute joie y habonde,
Car demourer ne puet dueil nullement
Ou noble lieu dit a la Table Ronde.
L’envoy
25 Prince, je tieng que soubz le firmament,
En temps d’esté, n’a place plus plaisant.
Car des beaus prez et des flours y redonde
La douce odeur, et le vray element
Que puet garir de tout mal et tourment
30 Ou noble lieu dit a la Table Ronde.
[1] Saint Hilaire corrige en Ou
[2] Ms ; vignes
