Balade 802 : D’an en an voy venir nouvelle annee (MCXCV)
Balade comment tousjours diminue le monde et que d’en en an en empirent toutes choses
D’an en an voy venir nouvelle annee,
Le jour de l’an, gens et edits nouveaulx
Abis changier, vie desordonee,
Face couvrir, si qu’om ne congnoist ceaulx
5 Aux cornettes qui cuevrent leurs museaulx,
Et pour ce est il petit de congnoissance
Ne de raison, car volunté s’avance
De mal en pis, met justice en mal an
Pour la honnir se force, brait et tance :
10 Certes tousjours vient pis ouan qu’entan.
Puis .lx. ans nous est guerre donne,
Mortalitéz, mocions desloyaulx,
Tempests du ciel, faultes de vins et blee,
Mors et prises de mains princes royaulx,
15 Pays destruis par subgiéz desloyaylx,
En mains regnes, Cecile, Espaigne, France,
Hongrie aussi, de ce fait demonstrance
L’Isle aux geans, Engleterre. Soudan
Et Sarrasin dient en leur creance : 323c
20 Certes tousjours vient pis ouan qu’entan.
Car l’Eglise est par pechié desolee,
Chief de la loy, par les rouges chapeaulx
Qui de tous poins l’ont prinse et estranglee
A l’aide de plusuers loups rapaux.
25 Les colleges qui furent sains et haulx
Des ouailles, de la saincte ordonnance,
Pour leurs estas tenir et leur bobance
Dont le cisme fait trop perilleux cran
Par leur default et leur fole cuidance :
30 Certes tousjours vient pis ouan qu’entan.
L’envoy
Prince, est la terre[1] au jour d’ui condempnee ?
Saige n’y voy ne creature nee
Qui n’y seufre paine, doleur ahan.
Seignourie est en mains lieux divisee,
35 Et quant j’ay bien toute chose advisee :
Certes tousjours vient pis ouan qu’entan.
[1] Ms. Princes la terre est
