Balade 801 : Princes qui ont peuples a gouverner (MCXCIV)
Autre balade comment les roys et lesp rinces ne doivent estre communs ne familiers avec leurs subgiéz et les causes pour quoy
Princes qui ont peuples a gouverner, 323a
Et les juges qui leur gardent leurs lois,
Ne se doivent pas trop humbles monstrer
A leurs subgiéz, qui en sont mainte fois
5 Enorgueilliz, et craingent moins les drois,
Quant reçoivent familiarité
Des souverains, et en sont ahurté
A faire moins devoir, obedience.
En tout cas soit gardee auttorité :
10 Qui trop humble est, c’est default de science.
De ce voit on maint prince contempner.
Doit un chascun ainsi parler aux roys,
Communement par la cote agraper,
Comme l’en fet ? Soit estrange au hault doys
15 Et po commun. Lors nobles et bourgois
Aux grans festes, jour de solempnité
Le verront la. Ait chiere de fierté.
[Et] si craindront touz sa magnificence,
Noble et subgiet, sanz tele humilité :
20 Qui trop humble est, c’est default de science.
Et s’il leur plaist eulx esbatre ou jouer,
Soit fait a part en leurs secréz destruis
O leurs privéz sanz varléz appeler,
Et qu’il n’en soit renommee ne voix.
25 Mains les voit on et aux champs et aux boys,
Et plus en sont cremu et redoubté.
Plus sont commun et moins en sont doubté.
De leurs juges en vault moins la puissance.
Leur peuple est lors d’eulx trop veoir honté :
30 Qui trop humble est, c’est default de science. 323b
L’envoy
Prince[1], seigneur, et toute poesté
De royaume, de pays, de cité
Qui gouvernéz, pour mieulx garder defence,
A voz subgiéz n’aiéz affinité,
35 Fors a raison, a droit et equité[2] :
Qui trop humble est, c’est default de science.
[1] Ms. Princes
[2] Ms. a equite
