Balade 800 : L’en parle trop senestrement (MCXCIII)
Balade comment pluseurs blasment verité sanz raison et les causes pour quoy
L’en parle trop senestrement
Sur Verité contre raison,
Et qu’om n’ose presentement
La dire, et n’est pas en saison.
5 C’est mal dit : pour quoy le blame on,
Quant il appert tout le contraire ? 322d
En mains sermons la voy retraire
Et crier[1] comme a la bretesce.
C’est bien dit, on n’en veult riens faire :
10 L’en ne fait pas tout ce qu’on presche.
Preschier le voy publiquement
Devant maint prince et maint baron,
Au peuple, et leur gouvernement,
Les dix plaies de Pharaon
15 Et quanc’om puet dire de bon
Pour dotrine et pour exemplaire
Et pour les cuers a tout bien traire :
Mais ilz sont trop dur et trop resche.
Autant vaulsist le prescher taire :
20 L’en ne fait pas tout quan com[2] presche.
Verité ne puet nullement
Avoir de fait cohercion
Sur Franc Vouloir, fors seulement
De blasmer sa folle action.
25 Si a juste excusacion
Quant elle ose crier et braire
Noz meffaiz. S’on het son affaire,
Qu’en puet elle ? En mains lieux s’empesche
De dire voir. C’est a reffaire :
30 L’en ne fait pas tout ce qu’om presche.
L’envoy
Prince tout bon entendement
Escoute, mais en un moment
Bien Dit s’estaint com la flamesche.
Convoitise destruit la gent.
35 Blasme qui veult or et argent :
L’en ne fait pas tout ce qu’om presche.
[1] Ms. crier hault
[2] Saint Hilaire corrige en tout ce qu’om
