Balade 799 : Huit choses doit homs desirier (MCXCII)
Balade des huit choses que tout homme vivant en ce monde doit avoir et acquerir pour renom et paradis avoir
Huit choses doit homs desirier
Et acquerir de son pouoir :
Science, pour en bien user,
Chevance, honeur, largesce avoir,
5 Humilité, faire devoir
Par tout ou il sera tenus.
Que Verité soit ses escus,
Et Pitié ou elle cherra.
Fuie vice, ensuye[1] vertus :
10 Dieu et le monde l’amera.
Par science pourra regner
Et refrener tout foul vouloir. 322c
Par chevance, indigence oster,
Estre larges de son avoir,
15 En temps et lieu, sanz decepvoir,
Honourer grans, moyens, menus,
Estre piteus a son dessus,
Veritables tant qu’il pourra.
S’ainsi fait ces .viii. poins conclus :
20 Dieu et le monde l’amera.
Lui vivant se fera loer.
Lui mort exemple aront si hoir
D’eulx comme leur chief gouverner.
Son bien fait pourra percevoir
25 L’ame de lui et recevoir
Les biens qu’il ara fait ça jus
En la haulte gloire lassus,
Ou Dieu le guerredonnera.
Ses noms vivra sanz estre exclus
30 Dieu et le monde l’amera.
L’envoy
Princes, bon fait ces poins garder
A tout homme, tant qu’il vivra.
Qui les garde ne doit doubter :
Dieu et le monde l’amera.
[1] Ms. ensuge
