Balade 798 : Adviséz vous, tous serviteurs de court (MCXCI)
Autre balade
Adviséz vous, tous serviteurs de court.
Car aussi tost que vous y avéz grace,
De toutes pars Envie sur vous court
Et n’y avéz fors un pié sur la glace.
5 Pourchacéz lors que prince bien vous face
De don d’argent ou de chose vendable.
Don de chastel n’est pas bien profitable,
Ne d’offices qui sont a voulenté.
Tost sont tollu et en brief revocable.
10 C’est le plus sain que d’estre bien renté,
Et d’acquerir pour le temps qui decourt
Terre et maison, ains que jeunesse passe,
Ne que l’en soit gouteux, viellart ne sourt,
Par trop servir, car on fait la grimace
15 A vieulz servens, la court les fuit et chace :
S’ilz n’ont de quoy, lors sont tresmiserable.
Mauvais se fait attendre a autruy table.
Telz fait le grant qui est fort endebté
Et qui languist par sa coulpe dampnable :
20 C’est le plus sain que d’estre bien renté.
Si grant n’y a qui tant saiche du hourt 322b
Qu’en un moment son piet a court ne glace,
Et qui jamais y puist estre ressourt
Ne soy tenir en ligne ou en espace.
25 C’est un bon jour mis en une besace
Devant derrier, c’est la roe versable
De l’aveulgle Fortune decevable
Qui tourne au bas ce qu’elle a hault monté.
Et puis qu’a court n’a nulle chose estable,
30 C’est le plus sain que d’estre bien renté.
L’envoy
Jeunes ervens, retenéz ce notable :
Com vous estes fusmes nous agreable,
Et tels que nous seréz vous rebouté.
Pour vivre lors en estat secourable
35 Penséz d’avoir un recept convenable.
C’est le plus sain que d’estre bien renté.
