Balade 797 : J’ay servi par .xxviii. ans (MCXC)
Supplicacion a mes seigneurs les ducs de Berry, Bourgogne, Orliens et Bourbon
J’ay servi par .xxviii.[1] ans 321d
A grant paine et de mon pouoir
Le bon roy Charle et ses enfans,
Le Quint (Dieux vueille s’ame avoir !)
5 Et loyaument fait mon devoir
En tout ce que l’en m’a commis :
Ce scet le roy Charle et Loys
Et maint de nos seigneurs de France,
Soufert leurs geus et leur enfance
10 Tant que viel suis. Si vous supplie
Qu’en vostre nouvelle ordonnance
Me laissiéz mes gaiges a vie
D’uissier d’armes, qui suis prenans,
Que le bon roy me fist avoir
15 A vie, et me fut assignans
Sur sa recepte recevoir
De Vitry, prandre et percevoir,
Que j’ay depuis receus et prins,
Conferméz par le roy, son fils,
20 Qui puis la garde et gouvernance
De Fymes, pour ma demourance,
Me bailla. Gaiges n’y a mie,
Fors d’uissier, et attendu[2] ce,
Me laissiéz mes gaiges a vie
25 Ordinaires. Pas ne sont grans
C’est partie de mon avoir.
Autre chose ne vous demans.
Par mes lettres pourréz sçavoir,
L’un des .viii. restrains suis, pour voir,
30 Des huissiers d’ordonnance escrus.
A petiz gaiges suis baillis,
Sanz seaulx avoir, a grant despence.
Charge n’ay de dons de finance.
Or ne souffréz que je mendie,
35 Mais de vostre begnivolence
Me laissiéz mes gaiges a vie. 322a
L’envoy
Mes seigneurs, soiéz remembrans
Que moy, povre Eustace des Champs,
Ay servi a royal lignie
40 Sanz charger, sanz estre marchans.
A ma fin, pour estre contens,
Me laissiéz mes gaiges a vie.
[1] Saint Hilaire corrige en .xx. et.viii.
[2] Saint Hilaire corrige en attendens
