Balade 795 : Plouréz, heraulx, plouréz, chevalerie (MCLXXXVII)
Autre balade de plour dudit connestable, de sa mort, de sa sepulture et de son epitaphe
Plouréz, heraulx, plouréz, chevalerie,
Tous menestrelz, trompettes, gens de guerre,
Plouréz, maistres de toute artillerie,
Mineurs aussi, vaillance en toute terre,
5 Le bon Loys, mareschal de Sancerre,
Puis, pour son bien, de France connestable.
Plouréz l’ostel grant, large et honourable,
Qu’a son temps tint li chevaliers loyaulx.
Plouréz pour lui, touz serviteurs royaulx,
10 Tous estranges, ses dons et sa largesce,
Qui tant hay tous hommes desloyaulx !
Plouréz pour lui, toute gent de noblesce !
Et Champaigne, pleure, triste et marrie,
Son nom, son cry qui a tousjours s’enterre,
15 Armes et tout, qu’il porta a sa vie,
Sanz reproucher. Sa mort le cuer me serre.
Or ne sera qui les porte ou desserre
Jamais nul jour : c’est chose piteable,
Car en ses faiz fut fort et vertuable. 316d
20 Diligence, ploure ses grans travaulx,
Ce qu’il souffrit, la durté et les maulx
Pour son seigneur, et la guerre qui blesce.
En lui ne fut onques trové de faulx :
Plouréz pour lui, toute gent de noblesce !
25 Plouréz, ses gens, servens, son escurie,
Ceuls qu’il a faiz, tout bachelier qui erre
Pour avoir nom. Armuriers, armoirie
Tenir vous fault desor enclos soubz serre.
Princes loyaulx, vueilléz service querre
30 A ses servens, chose est remunerable,
Qui sont dispers. Soiéz leur secourable.
Leur chief est mort qui tant vous fut feaulx.
Par son amour, aiéz pité sur yaulx,
Pour exempler toute gent de jonesce
35 De faire bien en armes, en chevaulx :
Plouréz pour lui, toute gent de noblesce !
L’envoy
Princes, mort fu Loys, vostre vassaulx,
Et de Paris, en fevrier, vo consaulx
A Saint Denis le conduit en tristesce,
40 Ou enterréz est deléz les plus haulx.
M. CCCC. et deux fut ses tombeaulx :
Plouréz pour lui toute gent de noblesce !
